गंगापूर : सलमान शेख – स्थानिक स्वराज्य संस्थामधील ओबीसी आरक्षण रद्द झाल्याचा निषेधार्थ भाजपच्या वतीने गंगापूर तालुक्यातील कायगाव टोका या पुलावर चक्काजाम आंदोलन करण्यात आला. या आंदोलनात ग्रामीण भागातील कार्यकर्ते मोठ्या संख्येने उपस्थित होते. यावेळी आंदोलकांनी औरंगाबाद-पुणे महामार्ग सुमारे एक तास बंद ठेऊन निषेध केला. गंगापूरचे भारतीय जनता पक्षाचे आमदार प्रशांत बंब यासह मनसेचे नेते, कार्यकर्ते यांनी रास्तारोको केला.
ओबीसी आरक्षण रद्द झाल्याने तसेच गंगापूर तालुक्यातील शेतकऱ्यांना पीक विमापासून महाविकास आघाडी सरकारने वंचित ठेवल्याने त्याचा धिक्कार करण्यात आला. यावेळी आमदार बंब यांनी तहसिलदार सारिका शिंदे यांना आपल्या मागणीचे निवेदन देऊन महाविकास आघाडी सरकारविरोधात घोषणाबाजी केली. राज्य सरकारने न्यायालयात ओबीसी आरक्षणाची बाजू मांडून स्थानिक स्वराज्य संस्थेतील स्थगित करण्यात आलेले आरक्षण पूर्ववत करावे. तसेच ओबीसी आयोग नेमून समाजाची जनगणना करून, 27 टक्के आरक्षण कायम ठेवावे. अशी मागणी यावेळी करण्यात आली. या आंदोलनात मोठ्या प्रमाणात भाजप कार्यकर्त्यांनी उपस्थिती लावली असून, मोठ्या प्रमाणात पोलीस फौजफाटा देखील तैनात करण्यात आला होता.
