कॅबिनेट मंत्रिमंडळाचा विस्तार लवकरच; महाराष्ट्रातून नारायण राणे आणि हिना गावित यांना मंत्रीपद मिळण्याची शक्यता

केंद्रीय मंत्रिमंडळाचा विस्तार हा बुधवारी होण्याची शक्यता असम, बुधवारीच मंत्र्यांचा शपथविधी पार पडले जाईल, अशी माहिती विश्वसनीय सूत्रांनी दिली आहे. मात्र याबाबत अद्याप कोणत्याही प्रकारची घोषणा केंद्र सरकारकडून करण्यात आलेली नाही. मंत्रिमंडळ विस्तार झाल्यास मे 2019 मध्ये दुसऱ्यांदा पंतप्रधान झाल्यावर पंतप्रधान मोदींच्या मंत्रिमंडळाचा हा पहिला विस्तार असणार आहे. आसामचे माजी मुख्यमंत्री सर्वानंद सोनोवाल, ज्योतिरादित्य शिंदे आणि सुशील मोदी यांची केंद्रीय मंत्रिमंडळात वर्णी लागण्याची दाट शक्यता वर्तवली जात आहे. तसेच महाराष्ट्रातील भाजपचे खासदार नारायण राणे आणि हिना गावीत यांचीही नावं चर्चेत असल्याची माहिती मिळत आहे.

उत्तर प्रदेशात पुढच्या वर्षी विधानसभा निवडणूक होणार असून, केंद्रीय मंत्रिमंडळ विस्तारात उत्तर प्रदेशवर विशेष लक्ष दिलं जाण्याची शक्यता आहे. राजकीयदृष्ट्या उत्तर प्रदेश हे सर्वाधिक महत्त्वाचे राज्य आहे. मंत्रिमंडळ विस्तारात पश्चिम बंगालचं प्रतिनिधित्व वाढू शकतं. भाजप सहकारी पक्ष जेडीयू आणि अपना दल (एस) ला प्रतिनिधित्व मिळण्याची शक्यता असल्याचं सांगण्यात येत आहे. पंतप्रधान मोदींच्या मंत्रिमंडळात आरपीआयचे नेते रामदास आठवले हे एकमेव गैर भाजप नेते आहेत. केंद्रीय मंत्रिमंडळात सध्या 53 मंत्री आहेत. नियमानुसार मंत्र्यांची जास्तीत जास्त संख्या ही 81 आहे.