पालघर-योगेश चांदेकर
बोर्डीच्या ग्रामपंचायत अधिकारी समिधा पाटील यांच्यावर कारवाई करण्यास प्रशासनाची टाळाटाळ
पालघरः डहाणू तालुक्यातील कासा आणि बोर्डी या दोन्ही मोठ्या ग्रामपंचायतीत झालेल्या कथित गैरव्यवहारप्रकरणी जिल्हा परिषदेने आता चौकशीचा निर्णय घेतला आहे. जिल्हा परिषद मुख्यकार्यकारी अधिकारी यांच्या दालनात बोर्डीचे सरपंच शाम दुबळा आणि कासाच्या सरपंच सुनीता कामडी तसेच तक्रारदारांना चौकशीसाठी बोलवण्यात आले असले, तरी ज्यांच्या काळात गैरव्यवहार झाला, त्या कासाचे माजी सरपंच रघुनाथ गायकवाड आणि बोर्डीच्या ग्रामपंचायत अधिकारी समीधा पाटील यांना मात्र चौकशीसाठी का बोलावण्यात आले नाही, असा प्रश्न या निमित्ताने उपस्थित होत आहे.
डहाणू तालुक्यातील बोर्डी आणि कासा या ग्रामपंचायतीचा कारभार वर्षभरापासून चर्चेत आहे. या ठिकाणी नियोजनात नसलेले कामे घेणे, कामे पूर्ण न होताच पैसे देणे, रंगकाम न करता आगाऊ रकमा देणे तसेच एकाच ठिकाणचे फोटो अनेक ठिकाणच्या कामावर अपलोड करणे असे गैरप्रकार या दोन्ही ग्रामपंचायतीत झाले. कासा ग्रामपंचायतीत तर मुदत संपलेल्या सरपंचाच्या ‘डिजिटल सिग्नेचर’चा वापर करून पैसे काढण्यात आल्याचा गंभीर प्रकार घडला आहे. हे सर्व प्रकार ‘लक्षवेधी’ने उघडकीस आणले.
गैरव्यवहारात सहभागी एजन्सीला वरदहस्त?
कासाचे ग्रामपंचायत अधिकारी मोहन पाचलकर यांना निलंबित करण्यात आले असले, तरी अद्याप बोर्डीच्या ग्रामपंचायत अधिकारी समीधा पाटील यांची मात्र अद्यापही चौकशी का करण्यात आली नाही, असा प्रश्न आता उपस्थित होत आहे. दरम्यान, शासनाने कोणत्या एजन्सीला काम द्यावे याबाबतचा आदेश काढला असतानाही तो आदेश डावलून कासा ग्रामपंचायतीत एकाच एजन्सीला वेगवेगळी कामे देण्यात आली. ‘बालाजी इंटरप्राईजेस’ या एजन्सीला कामे देताना निविदा प्रक्रिया तसेच अन्य कोणत्याही बाबींचा वापर करण्यात आला नाही. या सर्व प्रकारामुळे शासनाचे आदेश धाब्यावर बसवण्यात आले असून ठरविक एजन्सीला कामे मिळावीत यासाठी सर्व अट्टहास करण्यात आल्याचे स्पष्ट होत आहे.
अहवालात दोषारोप, तरी चौकशीस टाळाटाळ
गटविकास अधिकाऱ्यांनी संदीप जाधव यांची याप्रकरणी चौकशी अधिकारी म्हणून नियुक्ती केली होती. त्यांच्याच अहवालानुसार ग्रामपंचायत अधिकाऱ्यांवर कारवाई होते आणि सरपंचांना त्याचे म्हणणे मांडण्यासाठी नोटीस बजावली जाते; परंतु ज्यांच्या काळात गैरव्यवहार झाला, त्या माजी सरपंचांना मात्र अद्यापही चौकशीसाठी बोलवले जात नाही. शिवाय या प्रकरणात ज्या एजन्सींना आगाऊ पैसे दिले, ज्यांच्यावर मेहेर नजर दाखवली आणि गैरव्यवहारात ज्या एजन्सी सहभागी झाल्या, त्यांच्यावर कारवाई करण्याचे धाडस जिल्हा परिषदेचा ग्रामपंचायत विभाग का दाखवत नाही अशी विचारणा आता केली जात आहे
खुलासा अमान्य, तरी चौकशीचा फार्स
कासा ग्रामपंचायतीत अनियमितता केल्याचा आरोप सिद्ध झाला असून जिल्हा परिषदेचे मुख्य कार्यकारी अधिकारी मनोज रानडे यांनी ग्रामपंचायत अधिकारी मोहन पाचलकर यांना अखेर निलंबित केले आहे. पाचलकर कासा ग्रामपंचायतीत वर्षानुवर्षे ठाण मांडून बसले होते. ग्रामपंचायत अधिकारी, कर्मचारी संघटनेच्या जोरावर ते प्रशासनावर दबाव आणून आपल्यावरील कारवाई टाळीत होते; परंतु त्यांच्यावरचे गंभीर आरोप आणि त्यांच्या गैरव्यवहाराचे एक एक कारनामे ‘लक्षवेधी’ ने उघडकीस आणले. पंचायत समितीच्या गटविकास अधिकाऱी पल्लवी सस्ते यांच्या अहवालानुसार अखेर याप्रकरणी चौकशी झाली. पाचलकर यांनी याप्रकरणी केलेला खुलासा प्रशासनाने अमान्य केला असून त्यांना निलंबित केले आहे.
ठपका ठेवला, तरीही म्हणणे मांडण्याची नोटीस नाही
कासाचे माजी सरपंच रघुनाथ गायकवाड यांच्यावर चौकशीच्या काळात ठपका ठेवण्यात आला होता. त्यांच्या काळात हा गैरव्यवहार झाला असून अद्याप त्यांच्यावर कोणतीही कारवाई करण्यात आलेली नाही. आता चौकशीला विद्यमान सरपंच सुनीता कामडी यांना नोटीस बजावण्यात आली असली, तरी गायकवाड यांना मात्र म्हणणे मांडण्यासाठी नोटीस बजावलेली नाही. कासा ग्रामपंचायतीत कचराकुंड्यांच्या खरेदीतही अनियमित्ता आढळली आहे. कचराकुंड्या खरेदी केल्या; परंतु या कचराकुंडयांची रजिस्टरला नोंदच झालेली नाही. पंधराव्या वित्त आयोगातून वैयक्तिक व साधने कचराकुंड्या आणि तीन चाकी ट्रस्ट सायकल व बॅटरी ऑपरेटर तीन चाकी सायकल शासन स्तरावर नियुक्त केलेल्या संस्थेकडून खरेदी करण्याच्या सूचना देण्यात आल्या तर शासनमान्य संस्थेकडून साहित्य खरेदी करण्याचा आदेश असतानाही त्या संस्थेकडून खरेदी न करता त्रयस्थ संस्थेकडून खरेदी करण्यामागे गैरव्यवहार करण्याचा हेतू असल्याचा ठपका पाचलकर यांच्यावर ठेवण्यात आला आहे.
मूल्यांकनापेक्षा जास्त रक्कम
कासा ग्रामपंचायतीत सात कामांची एकूण रक्कम १४ लाख ८६ हजार ९९९ रुपये संबंधित ठेकेदारास धनादेशाद्वारे ग्रामपंचायतीमार्फत अदा करण्यात आली; परंतु या कामांचे एकूण मूल्यांकन अकरा लाख सात हजार ४३१ रुपये होते. मूल्यांकनानुसार देय रकमेच्या तीन लाख १९ हजार ५२८ रुपये इतकी रक्कम जास्त देण्यात आली. ज्या संस्थांवर पाचलकर यांनी मेहेरनजर दाखवून त्यांना पैसे दिले, त्यांनाही काळ्या यादीत टाकण्याची आवश्यकता आहे.
कोट
‘कासा ग्रामपंचायतीत गैरव्यवहारप्रकरणी म्हणणे मांडण्य़ासाठी मला नोटीस आली आहे. मी केलेल्या तक्रारीनुसार चौकशी झाली. ठपका ठेवण्यात आला; परंतु ‘डिजिटल सिग्नेचर’च्या गैरव्यवहार प्रकरणी रघुनाथ गायकवाड यांना चौकशीसाठी बोलवणे अपेक्षित आहे तसेच त्यांच्यावर फौजदारी गुन्हा दाखल व्हावा याकरिता मी पाठपुरावा करणार आहे
स्वाती राऊत, माजी सदस्य, पंचायत समिती, डहाणू
कोट
‘बोर्डी ग्रामपंचायतीच्या कारभाराबाबत गेल्या वर्षभरापासून आम्ही आवाज उठवत आहोत. ग्रामपंचायत अधिकारी समीधा पाटील यांची चौकशी करण्याची आवश्यकता आहे. त्यांच्यावर कारवाई करण्यासाठी मी पाठपुरावा करतोय पण उपमुख्यकार्यकारी अधिकारी यांना त्यांनी केलेली अनियमितता माहिती असूनही अजूनही कार्यवाही करण्यात येत नाही त्यांच्यावर तात्काळ कार्यवाही करावी ही माझी मागणी आहे
दिनेश ठाकूर, सदस्य, ग्रामपंचायत बोर्डी
