पालघर-योगेश चांदेकर
वसईच्या आमदार स्नेहा दुबे पंडित यांच्या पाठपुराव्याला यश : १ जूनपासून बस प्रवासावर महिलांना ५०% सवलत
पालघर-महाराष्ट्र शासनाच्या निर्देशानुसार एस.टी. प्रवासात महिलांना ५०% सवलत दिली जात असून, MMRDA क्षेत्रातील ठाणे व नवी मुंबई महापालिकांनी या योजनेची अंमलबजावणी सुरू केली आहे. मात्र, वसई-विरार शहर महानगरपालिका क्षेत्रातील महिलांना अद्याप ही सवलत मिळत नव्हती.
या मुद्द्याची गांभीर्याने दखल घेत वसई विधानसभा मतदारसंघाच्या आमदार स्नेहाताई दुबे पंडित यांनी महिलांसाठी बस प्रवासात ५०% सवलत मिळावी यासाठी परिवहन प्रताप सरनाईक जी, महिला व बालविकास मंत्री आदिती तटकरे जी व वसई-विरार महापालिका आयुक्त अनिलकुमार पवार यांच्याकडे सातत्याने पत्रव्यवहार व पाठपुरावा केला.
या सातत्यपूर्ण प्रयत्नांना यश मिळाले असून, आज दिनांक २३ मे रोजी महापालिका मुख्यालयात आयुक्त अनिलकुमार पवार यांनी अधिकृत पत्राद्वारे कळविले की, ०१ जून २०२५ पासून वसई-विरार शहर महानगरपालिका क्षेत्रातील महिलांना बस प्रवासाच्या तिकिटात ५०% सवलत देण्यात येणार आहे.
या निर्णयामुळे वसई-विरारमधील हजारो महिला प्रवाशांना आर्थिक दिलासा मिळणार असून, या यशस्वी पाठपुराव्याबद्दल परिसरातील महिलांकडून वसईच्या आमदार स्नेहा ताई दुबे पंडित यांचे विशेष कौतुक केले जात आहे.
