‘स्मार्ट सिटी’ शहर बससेवेत औरंगाबाद देशात अवलस्थानी

औरंगाबाद : सलमान शेख – स्मार्ट सिटी योजनेत औरंगाबाद शहराने सर्वोत्कृष्ट शहर वाहतूक बससेवा राष्ट्रीय पुरस्कार पटकावला आहे. अर्बन मोबिलिटी या प्रकारात औरंगाबाद स्मार्ट सिटीने पहिला क्रमांक प्राप्त केला आहे. औरंगाबाद पाठोपाठ सुरत दुसऱ्या तर अहमदाबाद तिसऱ्या क्रमांकावर आहे. केंद्र सरकारच्या गृहनिर्माण व शहरी कामकाज मंत्रालयातर्फे शुक्रवारी दुपारी 4.30 वाजता विडिओ कॉन्फरन्सद्वारे बैठक पार पडली. स्मार्ट सिटी मिशनच्या सहाव्या वर्धापन दिनानिमित्त केंद्रीय मंत्री हरदीप सिंह पुरी, सचिव दुर्गा शंकर मिश्रा, संचालक कुणाल कुमार याच्या उपस्थितीत पाच वेगवेगळ्या प्रवर्गात पुरस्कारांची घोषणा करण्यात आली. त्यात औरंगाबाद स्मार्ट सिटी डेव्हलपमेंट कॉर्पोरेशन लिमिटेडचे मुख्य कार्यकारी अधिकारी अरुण शिंदे सहभागी झाले होते. त्यात औरंगाबाद स्मार्ट सिटीला ‘माझी स्मार्ट बस’ साठी प्रथम पुरस्कार घोषित करण्यात आले आहे.